रामचन्द्र महर्जन
वैशाख १०, काठमाडौं
महाधिबेशन नजिकिएसंगै जनताको बहुदलिय जनवाद र नयाँ नेतृत्वको विषयमा बहस भईरहेको छ एमाले भित्र । पार्टीको नेतृत्व लिन बरिष्ठ नेता माधवकुमार नेपाल र संसदीय दलका नेता केपी ओली अघि सरेसंगै नेता कार्यकर्ता पनि ध्रवीकृत भएका छन् । पहिले अध्यक्ष झलनाथ खनालको क्याम्पमा रहेका उपाध्यक्ष वामदेव गौतम र महासचिव इश्वर पोखरेल ओली खेमामा पुगेसंगै नेतृत्वको होड रोमाञ्चक पनि बन्दै गएको छ ।
माले कालका सहयात्री तितरवितर भएपनि उपाध्यक्ष गौतम भने पछिल्लो पटक ओलीलाई जिताउन कम्मर कसेर लाग्नुभएको छ । ‘मेरो हिसावले अध्यक्षको पहिलो प्रत्यासी त म नै हुँ । तर के गर्नु आफु परियो पार्टी फुटुवा त्यही भएर पछि सरेको छु ।’ नेता बामदेव गौतमले भन्नुभयो– ‘पुरानोले अव दावी नगरेर नयाँलाई दिनुपर्छ, नयाँलाई दिइयो भने पार्टीमा गतिशिलता पनि आउँछ, केपी कमरेडले सातौ महाधिवेसन देखि अध्यक्षका लागि इच्छा देखाईरहनु भएको छ र मैले घोषणा पनि गरि सके म उहाँलाई नै समर्थन गर्छु ।’
महाधिबेसनको समय नजिकिदै गर्दा हरेक जसो सार्वजनिक कार्यक्रममा बरिष्ठ नेता नेपाल र संसदीय दलका नेता ओली आफ्नै शैलीमा पार्टीको नेतृत्वमा दावी गरिरहेका भेटिन्छन् । नवौं महाधिबेसनले सबै ठिक पार्ने बुझाई छ, ससदीय दलका नेता ओलीको । ‘पार्टी भित्र अस्तव्यस्तता छ, आधा पक्ति काम विहिन छ, कसले के गरिरहेको छ थाहा छैन ।’ उहाँ भन्नुहुन्छ– ‘त्यसैले अब पार्टीलाई गतिशिल बनाउनु पर्यो, र मलाई विश्वास छ नवौं महाधिबेसनले सब ठिक गर्नेछ ।’
एमालेको आठौं महाधिबेसनले जबजलाई पार्टीको सिद्धान्तका रुपमा व्याख्या गर्दै अध्यक्षमा कुनै पनि व्यक्ति दुई कार्यकाल भन्दा बढी बस्न नपाउने नीति बनाएको थियो । यसपटकको महाधिबेसनवाट नेताको उमेर हद तोक्नुपर्ने आवाज समेत उठिरहेको छ । नेतृत्व दावी गरेका बरिष्ठ नेता नेपाल भने त्यसपं्रति सन्तुष्ट हुनुहुन्न । उहाँ भन्नुहुन्छ– ‘एमाले भित्र सही नेतृत्व दिन सक्ने मान्छे चाहिएको छ, यो पालै पालो, भागवण्डामा पार्टी लाने होइन् ।’ बरिष्ठ नेता नेपाल थप्नुहुन्छ– ‘पार्टीलाई प्राइभेट लिमिटेड जस्तो चलाएर हुदैन, हो सबैको आ आफ्नै विशेषता छन् नेताहरुमा तर पार्टी चलाउने कुरा रहर गरेर मात्र हुदैन् ।’
हरेक महाधिबेसनलाई एकता र सहमतिको महाधिबेसन भन्ने गरेपनि नेतृत्व छनौटका बेला भने ति बिषय सेलाउने गरेका छन् । आगामी महाधिबेसनका लागी पनि अनेक खालका बहस र पदका लागि तछाड मछाड शुरु भईसकेको छ । अझै कुनै खेमाको समर्थनमा नउत्रिएका अध्यक्ष झलनाथ खनाल भने अझैपनि एकताकै महाधिबेशन हुने दावी गरिरहनुभएको छ । ‘म यो महाधिबेसनलाई वैचारिक, राजनीतिक, संगठनात्मक रुपमा एकताबद्ध बनाउन कटिबद्ध छु ।’ अध्यक्ष खनाल भन्नुहुन्छ– ‘आगामी महाधिबेसनलाई वैचारिक, राजनीतिक, संगठनात्मक रुपमा एकता र सहमतिको बनाउन सबै कमरेडहरु दृढ भएर लाग्नुपर्छ ।’
जबजको परिमार्जन र नयाँ पुस्तालाई नेतृत्व हस्तान्तरण गर्ने बिषय जोडतोडले उठेपनि पुरानै नेताको हानथापका कारण नवौ महाधिबेशन पनि अघिल्ला जस्तै हुने संभावना बढेको छ । कतिपय युवाले वैचारिक बिषयमा बहस गरेपनि नेतृत्वमा दावी गर्ने हैसियत अझै बनाइसकेका छैनन् । यस्तो अबस्थामा नेपाल वा ओली जसले नेतृत्व हत्याएपनि पुरानै नेताको निरन्तरता हुने कुरा भने स्पष्ट भइसकेको छ ।
- See more at: http://radiokantipur.org/kantipur-diary/11290/#sthash.55KEXC1S.OWKoq3d8.dpuf